ГлавнаяМорской архивИсследованияБиблиотека












Логин: Пароль: Регистрация |


Голосование:
Вам нравится наш сайт?


Отличный сайт!
Хороший сайт
Встречал и получше
Совсем не понравился



Самое читаемое:



» » Иван Калита
Иван Калита
  • Автор: admin |
  • Дата: 25-09-2013 15:38 |
  • Просмотров: 9774

Вернуться к оглавлению

Приложения

Грамота Новгорода тверскому великому князю Михаилу Ярославичу 1304-1305 гг.

Благословление от владыкы, поклон от посадника Георгия, и от тысячкого Андреяна, и от всех старейших, и от всех мънших, и от всего Новагорода господину князю Михаилу Ярославицю. На семь та, княже, хрьст целовати к всему Новугороду, на чемь целовали пьрвии князи, и дед твои, и отьць твои. Новгород ти дьржати по пошлине, како держал дед твои и отьць твои. Грамот ти не посужати. А мужа ти без вины волости не лишити. А бес посадника ти волостии не раздавати, ни суда ти судити, ни грамот давати. А волостии ти, княже, новгородьскых своими мужи не дьржати, дьржати ти мужи новгородьскыми; а дар тобе от тех волостии емати. А се волости новогородьскыя: Волок с всеми волостьми, а дьржати ти свои тиун на половине, а новгородьць на половине, в всей волости Волочкои; а на Тьржку ти, княже, дьржати свои тиун на своей части, а новгородьць на своей части. А се волости новгородьскыя: Бежице, Городьць, Мелеча, Шипи-но, Егна, Волъгда, Заволочие, Голопьрьмь, Тьре, Пьрьмь, Печера, Югра; а ты волости дьржати ти мужи новгородьскыми. А свинье бита ти, княже, за 60 вьрст около города, а дале куда кому годно. А закладников ти не приимати, княже, по всей волости Новгородьскои, ни княгини твоей, ни бояром твоим, ни дворяном твоим. А сел ти не ставити по Новгородьскои волости, ни твоей княгыни, ни твоим бояром, ни твоим дворяном, ни купити, ни даром приимати. А свобод ти не ставити по Новгородьскои волости. А что сел, княже, на Новгородьскои земли твоих, или княгыниных, или бояр твоих, тех сел тобе съступитися: а куны емати на них у истьцев своих, у кого будеть кто купил; а земля святой Софии к Новугороду. А что сел и свобод Дьмитриевых, то дали есме быле Андрею до живота Андреева в хрьстное целование, а потомь Новугороду то все; а тобе, княже, в то не въступитися. А рубеж ти дати правый по старому рубежю, в хрьстное целование, как было при отци твоемь Ярославе. А на Озвад ти, княже, ездити лете звери гонит. А в Руоу не ехати, ехати в Русу на третьюю зиму. А в Ладогу ти, княже, ездити на третиее лето. А осетрьнику твоему ездити в Ладогу по грамоте отца твоего, како пошло. А в Вълъгде ти тиуна не държати. А судиям твоим ездити по волости, куда пошло, лете с Петрова дни, по пошлине. А что пожень княжих, то князю; а новгор-одьское Новугороду. А вывод ти, княже, в всей Новгородь-скои волости не надобе. А с Суждальскои земли тобе, княже, новгородца не судити, ни грамот давати, ни волостии раздав-ати. А по всей Суждалъскои земли гостити новгородцю без рубежа. А у мыта у новгородца и у новоторъжца по две векше от воза, и от лодие, и от хмелна короба, и от льняна. А дворяном твоим ходити по пошлине: от князя по пяти кун, а от тиуна по две куне. А за Волок ти, княже, своего мужа не слати, продаяти ти дань своя новгородцю. А холопу и робе на господаря веры не яти. А в Немечком дворе тобе, княже, търговати нашею братиею; а приставов ти не приставливати; а двора ти не затваряти. А что подеялося доселе межи тобою и твоими мужи Новугороду до хрьстьного целования, то ти все, княже, отложити и твоим мужем. А твоим судиям по волости самосуда не замышляти на людех по Новгородьскои волости. А вязчего не пошло по Новгородьскои волости, то судиям твоим отложити. А холопа и половника не судити твоим судиям без господаря; судити князю в Новегороде, тако пошло. И купцины в силу не судити въ волости. А кто живет въ Търъжку на Новотьрзькои земли, а к святому Спасу не тягнеть к Търъжку, князем отьемъся, а ти поидуть ис Торъжку, куда им годно. Аже възъидеть к тобе, княже, на мужа обада, тому ти веры не яти, дати тому исправа. А у купьць повозов не имати, разве ратной вести. А коли, княже, поедешь въ Новгородъ, тъгда тобе дар емати по постояниям; а коли поедешь из Новагорода, тъгда дар не надобе. А холоп или половник забежить в Тферьскую волость, а тех, княже, выда-вати; который ли въстворить суд собе, судити его в Новегороде. А нелюбие, княже, тобе отложити и от старейших, и от мьнших, и от всех. На семь, господине, на всемь целуй хрьст при нашей братии, при послех.

 

Текст печатается по изданию: Грамоты Великого Новгорода и Пскова. М.; Л., 1949. С. 16 – 18.

 

Жалованная грамота великого князя Ивана Даниловича Калиты печорским сокольникам Жиле с ватагой об освобождении их от даней и некоторых повинностей

1328-1340 гг.

Се яз, князь великий Иван Даниловичь всея Руси, пожаловал есмь соколников печерских, хто ходит на Печеру, Жилу с друга. А се их имена: Жила, Олюша, Василко, Степан, Карп, Федец, Острога, Бориско, Кузма, Дмитрок, Власии, Микити-ца Иванов сын, Семенец, Кондрат, Чешко, Семенец, Григорь, Степанец, Савица. Не надобе им никоторая дань, ни ко старосте им не тянута; и что у них третники и наймиты, хто стражет на готовых конех, а в кунах, и тем не надобе никоторая дань, ни ко старосте им не тянута, ни биричь их не поторгыват, не надобе ни корм, ни подвода. Хто ли через мою грамоту что у них возмет, и яз, князь великий, кажню, занеже ми люди те надобны. А приказал есми их блюсти Меркурью. А ты, Меркуреи, по моей грамоте блюди их, а в обиду их не выдавай никому.

 

Текст печатается по изданию: Акты социально-экономической истории Северо-Восточной Руси конца XIV– начала XVI в. Т.З.М.; Л., 1964. С. 15.

 

Духовная грамота великого князя Ивана Даниловича Калиты

Около 1339 г.

а) Первый вариант

Во имя Отця и Сына и Святаго Духа, се яз, грешный худыи раб Божий Иван, пишу душевную грамоту, ида в Ворду, никимь не нужен, целымь своимь умомь, в своемь здоровьи. Аже Бог что розгадаеть о моемь животе, даю ряд сыном своим и княгини своей.

Приказываю сыном своим очину свою Москву. А се есмь им роздел учинил:

Се дал есмь сыну своему болшему Семену: Можаеск, Коломъну со всими Коломеньскими волостми, Городенку, Мезыню, Песочну, Похряне, Усть-Мерьску, Брошевую, Гвоздну, Ивани, деревни Маковець, Левичин, Скулнев, Канев, Гжелю, Горетову, Горки, село Астафьевьское, село на Северьсце в Похрянъском уезде, село Костянтиновское, село Орининьское, село Островьское, село Копотеньское, селце Микульское, село Малаховьское, село Напрудское у города.

А при своемь животе дал есмь сыну своему Семену: 4 чепи золоты, 3 поясы золоты, 2 чаши золоти с женчуги, блюдце золото с женчугомь с каменьемь. А к тому еще дал есмь ему 2 чума золота болшая. А ис судов ис серебрьных дал есмь ему 3 блюда серьбрьна.

А се даю сыну своему Ивану: Звенигород, Кремичну, Рузу, Фоминьское, Суходол, Великую свободу, Замошьскую свободу, Угожь, Ростовци, Окатьева свободка, Скирминовьское, Тростна, Негуча. А села: село Рюховьское, село Каменичь-ское, село Рузьское, село Белжинъское, село Максимовское, село Андреевское, село Вяземьское, село Домонтовьское, село в Замошьскои свободе, село Семьциньское.

А из золота дал есмь сыну своему Ивану: 4 чепи золоты, пояс болшии с женчугомь с каменьемь, пояс золот с каптор-гами, пояс сердоничен золотомь окован, 2 овкача золота, 2 чашки круглый золоты, блюдо серебрьно ездниньское, 2 блюдди меншии.

А се дал есмь сыну своему Андрею: Лопастну, Северьску, Нарунижьское, Серпохов, Нивну, Темну, Голичичи, Щитов, Перемышль, Растовець, Тухачев. А се села: село Талежьское, село Серпоховьское, село Колбасиньское, село Нарьское, село Перемышльское, село Битяговское, село Труфонов-ское, село Ясиновьское, село Коломниньское, село Ногатинь-ское.

А из золота дал есмь сыну своему Андрею: 4 чепи золоты, пояс золот фрязьскии с женчугомь с каменьемь, пояс золот с крюкомь на червчате шелку, пояс золот царевьскии, 2 чары золоты, 2 чумка золота меньшая; а из блюд, – блюдо серебрьно, а 2 малая.

А се даю княгини своей с меншими детми: Сурожик, Мушкову гору, Радонежское, Бели, Воря, Черноголовль, на Вори свободка Софроновская, Вохна, Деиково раменье, Да-нилищова свободка, Машев, Селна, Гуслиця, Раменье, что было за княгинею. А села: село Михаиловское, село Луцинь-ское, село у озера, село Радонежское, село Деигуниньское, село Тыловское, Рогожь, село Протасьевское, село Аристовь-ское, село Лопастеньское, село Михаиловское на Яузе, 2 селе Коломенский.

А из городьских волостии даю книгини своей осмничее. А тамадою и иными волостми городьскими поделятся сынове мои; тако же и мыты, который в котором уезде, то тому. А оброкомь медовымь городьскимь Василцева веданья поделятся сынове мои. А что моих бортников и оброчников купленых, который в которой росписи, то того.

А по моим грехом, пи имуть искати татарове которых волостии, а отоимугься, вам, сьшом моим, и княгини моей поделити вы ся опять тыми волостми на то место.

А численыи люди, а те ведають сынове мои собча, а блюдуть вси с одиного. А что мои люди куплении в великомь свертце, а тыми ся поделять сынове мои.

А что золото княгини моее Оленино, а то есмь дал дчери своей Фетиньи, 14 обручи и ожерелье матери ее, монисто новое, что есмь сковал. А чело и гривну, то есмь дал при собе. А что есмь придобыл золота, что ми дал Бог, и коробочку золотую, а то есмь дал княгини своей с меншими детми.

А ис порт из моих сыну моему Семену: кожух черленыи женчужьныи, шапка золотая. А Ивану, сыну моему: кожух желтая обирь с женчугомь и коць великий с бармами. Андрею, сыну моему: бугаи соболий с наплечки с великим женчугомь с каменьемь, скорлатное портище сажено з бармами. А что есмь нынеча нарядил 2 кожуха с аламы с женчугомь, а то есмь дал меншим детем своим, Марьи же Федосьи, ожерельем.

А что моих поясов серебрьных, а то роздадять по попьям. А что мое 100 руб. у Ески, а то роздадять по церквем. А что ся остало из моих судов из серебрьных, а тым поделятся сынове мое и княгини моя. А что ся останеть моих порт, а то роздадять по всим попьямь и на Москве. А блюдо великое серебрьное о 4 колця, а то есмь дал святей Богородици Володимерьскои.

А приказываю тобе, сыну своему Семену, братью твою молодшую и княгиню свою с меншими детми, по Бозе ты им будешь печалник.

А что есмь дал сыну своему Семену стадце, а другое Ивану, а иными стады моими поделятся сынове мои и княгини моя.

А на се послуси: отець мои душевьныи Ефрем, отець мои душьвныи Федосии, отець мои душевьныи поп Давыд.

А грамоту писал дьяк князя великого Кострома.

А кто сю грамоту порушить, судить ему Бог.

На лицевой стороне грамоты привешена серебряная позолоченная печать великого князя Ивана Даниловича Калиты.

 

б) Второй вариант

Во имя Отця и Сына и Святаго Духа, се яз грешный худыи раб Божий Иван, пишу душевную грамоту ида в Ворду, никимь не нужен, целымь своимь умомь, в своемь здоровья. Аже Бог что розгадаеть о моемь животе, даю ряд сыном своим и княгини своей.

Приказываю сыном своим очину свою Москву. А се есмь им роздел учинил:

Се дал есмь сыну своему болшему Семену: Можаеск со всими волостьми, Коломну со всими Коломеньскими во-лостьми, Городенку, Мезыню, Песочну, и Середокоротну, Похряне, Усть-Меръску, Брошевую, Гвоздну, Ивани, деревни Маковець, Левичин, Скулнев, Канев, Гжелю, Горетову, Горки, село Астафьевьское, село на Северьсце в Похрянь-скомъ уезде, село Костянтиновьское, село Орининьское, село Островьское, село Копотеньское, селце Микульское, село Малаховьское, село Напрудьское у города.

А при своемь животе дал есмь сыну своему Семену: 4 чепи золоты, 3 поясы золоты, 2 чаши золоты с женчюги, блюдце золото с женчюгомь с каменьем, 2 чума золота болшая. А ис судов ис серебрьных дал есмь ему 3 блюда серьбрьна.

А се даю сыну своему Ивану: Звенигород, Кремичну, Рузу, Фоминьское, Суходол, Великую свободу, Замошьскую свободу, Угожь, Ростовци, Окатьеву свободку, Скирминовьское, Тростну, Негучю. А села: село Рюховьское, село Каменич-ское, село Рузьское, село Белжиньское, село Максимовское, село Андреевское, село Вяземьское, село Домонтовское, село в Замошьскои свободе, село Семциньское.

А из золота дал есмь сыну своему Ивану: 4 чепи золоты, пояс золот болшии с женчюгомь с каменьемь, пояс золот с капторгами, пояс сердоничен золотомь окован, 2 овкача золота, 2 чашки круглый золоты, блюдо серебрьно езднинь-ское, 2 блюдци меншии.

А се дал есмь сыну своему Андрею: Лопастну, Северьску, Нарунижское, Серпохов, Нивну, Темну, Голичичи, Щитов, Перемышль, Растовецъ, Тухачев. А се села: село Талежьское, село Серпоховьское, село Колбасиньское, село Нарьское, село Перемышльское, село Битяговьское, село Труфоновь-ское, село Ясиновьское, село Коломнинское, село Ногатинь-ское.

А из золота дал есмь сыну своему Андрею: 4 чепи золоты, пояс золот фрязьскии с женчюгомь с каменьемь, пояс золот с крюкомь на чьрвьчате шелку, пояс золот царевьскии, 2 чары золоты, 2 чумка золота меншая; а из блюд, – блюдо серебрьно, а два малая.

А се даю княгини своей с меншими детми: Сурожик, Мушкову гору, Радонежьское, Бели, Воря, Черноголовль, на Вори свободка Софроновьская, Вохна, Деиково раменье, Данилищова свободка, Машев, Селна, Гуслиця, Раменье, что было за княгинею. А села: село Михаиловьское, село Луцинь-ское, село у озера, село Радонежьское, село Деигуниньское, село Тыловское, Рогожь, село Протасьевское, село Аристовское, село Лопастеньское, село Михаиловское на Яузе, 2 селе Коломеньскии.

А из городских волостии даю княгини своей осмничее. А тамгою и иными волостми городскими поделяться сынове мои; тако же и мыты, который в которого уезде, то тому. А оброкомь городскимь Василцева веданья поделяться сынове мои. А что моих бортников и оброчников купленых, который в которого росписи, то того.

А по моим грехом, ци имуть искати татарове которых волостии, а отыимуться, вам, сыном моим, и княгини моей поделити вы ся опять тыми волостми на то место.

А числьныи люди ведають сынове мои собча, а блюдуть вси с одиного. А что мои люди куплении в великом свертце, а тыми ся поделять сынове мои.

А что золото княгини моее Оленине, а то есмь дал дчери своей Фетиньи, 14 обручи и ожерелье матери ее, монисто новое, что есмь сковал. А чело и гривну, то есмь дал при собе. А что есмь придобыл золота, что ми дал Бог, и коробочку золотую, а то есмь дал княгини своей с меншими детми.

А ис порт из моих сыну моему Семену: кожух черленыи женчужныи, шапка золотая. А Ивану, сыну моему: кожух желтая обирь с жьнчугомь, коць великий с бармами. Андрею, сыну моему: бугаи соболий с наплечки с великимь женчюгомь с каменьем, скорлатное портище с бармами. А что есмь нынеча нарядил 2 кожуха с аламы с женчюгомь, а то есмь дал меншим детем своим, Марьи же Федосьи, ожерельем.

А что моих поясов серебрьных, а то роздадять по попьям. А что мое 100 руб. у Ески, а то роздадять по церквам. А что ся остало из моих судов из серебрьных, а тым поделяться сынове мои и княгини моя. А что ся останеть моих порт, а то роздадять по всим попьям и на Москве. А блюдо великое о 4 колця, а то даю святей Богородици Володимерскои.

А что есмь дал сыну своему Семену стадце, а другое Ивану, а иными стады моими поделятся сынове мои и княгини моя.

А прочь Московьских сел, даю сыну своему Семену села своя купленая: село Аваковское в Новегороде на Улале, другое в Володимери Борисовское.

А что есмь купил село Петровское, и Олексиньское, Все-добричь, и Павловьское на Масе, половину есмь купил, а половину есмь сменил с митрополитом.........[Лист с текстом разорван: в этом месте может уместиться около 12 букв] ця на Масе, что есмь купил у Афинея, то даю сыну своему Ивану.

А что есмь купил село Варварьское и Меловьское у Юрьева, что есмь сменил на Матфеищовьское село, то даю сыну своему Андрею.

А что село Павловское, бабы нашее купля, и Новое селце, что есмь купил, и Олександр святыи, что есмь купил на Костроме, то даю княгини своей.

А что есмь купил село в Ростове Богородичское, а дал есмь Бориску Воръкову, аже иметь сыну моему которому служити, село будет за нимь, не иметь ли служити детем моим, село отоимут.

А что есмь прикупил селце на Кержачи у Прокофья у игумна, другое Леонтиевское, третье Шараповское, а то даю святому Олександру собе в поминанье.

А приказываю тобе, сыну своему Семену, братью твою молодшую и княгиню свою с меншими детми, по Бозе ты им будешь печалник.

А кто сю грамоту порушит, судить ему Бог.

А на се послуси: отець мои душевный Ефрем, отець мои душевный Федосии, отець мои душевный, поп Давыд.

 

На обороте листа помета: Духовные, и списки з духовных, и прошная грамота.

На лицевой стороне грамоты след от прикрепления печати.

 

Текст печатается по изданию: Духовные и договорные грамоты великих и удельных князей XIV – XVIвв. М.; Л., 1950. С. 7 – 11.

 

Докончание (договор) великого князя Семена Ивановича с князьями Иваном Ивановичем и Андреем Ивановичем

Около 1350-1351 гг.

Се я[з, князь великий Семе]н Иванович [всея] Руси, [с св]оею братьею с молодшею, со князем с [Иваном] и с князем [Андреем], целовали есмы межи со [бе] крест у отня гроба.

Быти ны заоди[н до живота. А брата своего стареиш]его имети ны и чтити в отцево место. А брату нашему нас име[ти]... [Лист разорван: в этом месте может уместиться около 10 букв] [Акто буде]ть брату нашему старейшему [недруг, то и н]ам недруг. А кто будеть брат[у нашему ста]реишему [друг, то и] нам друг. А тобе, господине, князь вел[икии, без нас] не доканчивати ни с ким. [А братье твое]и молодше[и без] тобе не доканчивати ни с [ким. А кто и]меть нас сваживати...[Лист разорван: в этом месте может уместиться около 12 букв], [исп]рава ны учинити, а нелюбья не держати, [а винов]атого казните по [исправе]...

..[Лист разорван: в этом месте может уместиться около 14 букв] [целовали] есмы по душевной грамоте отця нашего, како ны отець наш роздел [дал, того ти под нами блюс]ти, а не обидети. А что есмы съступилися тобе на старей [шинст-во]...[Лист разорван: в этом месте может уместиться около 18 букв] пол-тамги, да тобе соколничии путь, и садовници, да конюший путь, и кони ставити...[Лист разорван: в этом месте может уместиться около 8 букв], ловчий путь, то же и потом на старейший путь, кто будеть старейший, [тому] пол-тамги, [а молодшим двум] пол-тамги, а опрочь того все на трое, и бортници в Пере...[Лист разорван: в этом месте может уместиться около 6 букв], и Добря[тинская борть].

А сел [князю] великому: Новое село на Купавне, Вы-шневьское село. А князю Ив[ану и] князю Андрею: Мих[але]вьское село, Ми[кульс]кое село [на Пру]женке, Мики[форо]вьское село, Парфень[евское] село...

...[Лист разорван: в этом месте может уместиться около 7 букв] [ко]го из нас Бог отьведет, печаловати[ся княгинею его и] детми, как при ж[ивоте, так и по жив]оте, а не [обидети тобе, ни] имати ничего ото княгини и от детии, чим ны [кого благословил отець наш по ро]зделу. [А по животе кто из бо]яр и слуг иметь служити у наших княгинь [и у детии...[Лист разорван: в этом месте может уместиться около 10 букв], нелюбья не] держати, [ни посягати] без исправы, но блюсти, как и своих. Или кто [из нас...[Лист разорван: в этом месте может уместиться около 12 букв] что примыслил или прику]пил, или кто по семь что кто прикупить [или примыслить чужее...[Лист разорван: в этом месте может уместиться около 8 букв] сво]им волостем, и того...[Лист разорван: в этом месте может уместиться около 5 букв] блюсти, а не обидети. Или что мя благослов[ила которыми волостьми тетка моя], княгини Анна, [Заячко-вым...[Лист разорван: в этом месте может уместиться около 26 букв], Тешевым, ...[Лист разорван: в этом месте может уместиться около 9 букв] свободкою, или что есмь прикупил Забереги...[Лист разорван: в этом месте может уместиться около 12 букв] куплю и того...[Лист разорван: в этом месте может уместиться около 6 букв] моей...[Лист разорван: в этом месте может уместиться около 7 букв] обидети...[Лист разорван: в этом месте может уместиться около 20 букв] кто что нашему...[Лист разорван: в этом месте может уместиться около 12 букв] блюсти, а не обидети... [Лист разорван: в этом месте может уместиться около 10 букв] а то...[Лист разорван: в этом месте может уместиться около 6 букв] с нами...[Лист разорван: в этом месте может уместиться около 6 букв]

...а нам в твои удел не слати...[Лист разорван: в этом месте может уместиться около 12 букв] московски имуг бита челом тобе, князю великому, на наших бояр и слуг московских, аже будешь на Москве, [тобе судити, а мы с тобою в суд шли, господине, опрочь Моск]вы, слати к тво[ему наместнику и к нашим...] ..[Лист разорван: в этом месте может уместиться около 15 букв], чинять исправу [московским бо]яром и слугам, а при[ставов ти не слати...]...[Лист разорван: в этом месте может уместиться около 9 букв] тобе, князю великому...[Лист разорван: в этом месте может уместиться около 5 букв] на наших бояр...[Лист разорван: в этом месте может уместиться около 5 букв] пристава, а нам...[Лист разорван: в этом месте может уместиться около 5 букв] к великому князю...[Лист разорван: в этом месте может уместиться около 15 букв] пошлые к городу...[Лист разорван: в этом месте может уместиться около 15 букв] наших уделех не купити, ни твоим бояром, ни слугам, ...[Лист разорван: в этом месте может уместиться около 6 букв] ни нашим бояром, ни слугам сел в твоем уделе и у численых...[Лист разорван: в этом месте может уместиться около 12 букв] двор московский...[Лист разорван: в этом месте может уместиться около 10 букв]

А который люди по нашим во[ло]стем выиманы...[Лист разорван: в этом месте может уместиться около 6 букв] нам к собе [не при]имати. А которы[х] людии отець наш, князь великий, выимал...[Лист разорван: в этом месте может уместиться около 16 букв] те так и знають свою службу, в которую кто уряжен, а нам их к собе не приимати.

А во [льны]м слугам воля, кто в кормленьи бывал и в доводе при нашем отци и при нас.

А чим ны благословил отець наш, волостми ли, порты ли, или инымь чимь, а тымь ся есмы поделили, того ны не поминати.

А где ми будет въсести на конь, всести вы со мною. А где ми будеть самому не всести, а будеть ми вас послати, всести вы на конь без ослушанья. А что ся учинить просто-рожа от мене, или от вас, или от моего тысяцьского, и от наших наместников, исправа ны учинити, а нелюбья не держати.

А бояром и слугам вольным воля: кто поедет от нас к тобе, к великому князю, или от тобе к нам, нелюбья ны не [держати]. А что Олексе Петрович вшел в коромолу к великому князю, нам, князю Ивану и князю Андрею, к собе его не приимати, ни его детии, и не надеятися ны его к собе до Олексеева живота, волен в нем князь великий, и в его жене, и в его детех. А тобе, господине, князь великий, к собе его не приимати же в бояре. А мне, князю Ивану, что дал князь великий из Олексеева живота, того ми Олексею не давати, ни его жене, ни его детем, ни инымь ничимь не подмагати их.

На семь на всемь целовали есмы крест межи [собе у] отня [гроба], [по любви, в правду].

[Атуго были]: Петр архимандритмосковьскии, Фили[мон] архимандрит [переяславский, Василии [Лист разорван: в этом месте может уместиться около 7 букв]... ты]сяцьскии, Ми-хаило Олександрович...[Лист разорван: в этом месте может уместиться около 4 букв] [Васильевич, Василии [Окатьевичь, Онанья околничии], Иван Ми...

 

На лицевой стороне грамоты привешена желтовосковая, почти совсем разрушившаяся печать.

Текст печатается по изданию: Духовные и договорные грамоты великих и удельных князей XIV – XVI вв. С. 11 – 13.

 

Похвала Ивану Калите из «Сийского Евангелия»

Около 1339-1340 г.

В лето 600-е 800-е 47-е (1340-е) инидикта 12 миротворенаго и солнечьного круга в 4-е лето висикостное, жидовь сего ирук в 7-е лето, епакта 18 лето, в 5-и каланд месяца марта, жидовь-скы нисана, написано бысть си еуангелие в граде Москове на Двину к святей Богородици повелениемь рабомь Божиимь Ананиею черньцемь. О семь бо князи великомь Иване пророк Езекии глаголеть: «В последнее время в апустевшии земли на запад въстанеть цесарь правду любя и суд не по мьзде судяи ни в поношение поганым странам. При семь будеть тишина велья в Рускои земли и въсияеть в дни его правда», яко же и бысть при его царстве. Хвалить Римьская земля Петра и Павла, Асия Иоана Богословеца, Индийская – Фому, Ераполь – Филипа, Руская земле – первозванаго апостола Андрея, Гречьская земля – цесаря Костянтина. Сему благородному князю великому Ивану створшему дела подобна в Рускои земли правоверному цесарю Костянтину. О семь бо песно-словьць глаголеть: «Постави, Господи, законодавца над ними, да разумеють языци, яко человеци суть». То же рек: «Боже, суд цесареви дай же правду сынови цесареву».

Сии бо князь великой Иоан имевше правый суд паче меры. Поминая божественае писания, исправльния святых и преподобных отец, по правиломь монокануньным ревнуя правоверному цесарю Устияну. В то бо время благочестию велию восиявши, многим святым церквам съзидаемым, учьнию божественых словес от уст его яко источнику велик» текущю, напаяющи благочестивых святитель сердца и христолюбивых в его державе людии. Безбожным ересам преставшим при его державе, многим книгам написаным его повелениемь, ревнуя правоверному цесарю гречьскому Мануилу. Любяи святи-тельскьш сан, постничьское житье любя и удержае правоверную святую веру. Сирым в бедах помощник, вдовици от насилник изимая яко от уст лвов.

Всей Рускои земли поминая велегласно державу его царства. Сии бо великий раб Божий Анания чернць; поминая его святительскыи сан, горя духовною мыслию к Богови, хотяи видети вышний Ерусалим, поминае душею первых правоверных цесарии, всех святых и молитвою – прародитель своих.

А писали многогрешнии дьяци Мелентии да Прокоша. Благословите их, а не клените.

 

Текст печатается по публикации: Мещерский Н. А.

К изучению ранней московской письменности. // Изучение русского языка и источниковедение. М., 1969. С. 94 – 96.

Вернуться к оглавлению

Читайте также: